الحرب بدأت، إسرائيل وأمريكا ضربوا إيران، وإيران ضربت العواصم العربية والخليجية كلها

كتب / خالد الجندي

🔴 الحرب بدأت، إسرائيل وأمريكا ضربوا إيران، وإيران ضربت العواصم العربية والخليجية كلها، وفي انفجار هائل في أبو ظبي وسقوط أول قتيل في الإمارات!

🔹️🟠 (وفي تحديث حصل وانا بنزل البوست: أنباء عن استهداف اسرائيل للقيادة الإيرانية ومقتل المرشد نفسه!)

في الساعات الأولى من صباح السبت، الرئيس الأمريكي دونالد ترامب أعلن بداية عملية عسكرية واسعة تحت اسم “Operation Epic Fury” بالتعاون مع إسرائيل، والهدف المرة دي مش بس تدمير المفاعلات النووية الإيرانية… لا.. ترامب قال نصًا كده: “إحنا هنغيّر النظام الإيراني ونمسح قدراتهم العسكرية من على وش الأرض”…

1️⃣ الموضوع بدأ بانفجارات متعددة من هجمات جوية إسرائيلية هزت قلب العاصمة الإيرانية طهران، والدخان غطى سماء منطقة “شارع باستور” اللي فيها القصر الرئاسي ومقر الأمن القومي… ودلوقتي الناس في طهران في حالة رعب، المدارس اتقفلت والأهالي بيجروا في الشوارع يلحقوا ولادهم تحت صوت الطيارات اللي بيضرب كل المنشآت الحيوية سواء مدنية أو عسكرية…

2️⃣ الإنترنت في إيران حاليًا وقع بنسبة 96% حسب النيويورك تايمز، ومحدش عارف أيه اللي بيحصل جوه البلد… الناس هناك بقت معزولة تمامًا عن العالم وسط ضربات جوية مكثفة استهدفت طهران وأصفهان وكرج ومدن غيرها…

🔸️ طب إيران سكتت؟!

🟣 لأ طبعًا… الرد الإيراني جه مزلزل، والتوعدات اللي كانوا بيقولوها نفذوها فعلًا… وخد بقى عندك…

3️⃣ صواريخ باليستية إيرانية استهدفت أكبر قواعد أمريكية حيوية في المنطقة، منها أولًا قاعدة “العديد” في قطر، وقاعدة “علي السالم” في الكويت، ومقر الأسطول الخامس في البحرين، ده غير إن في أصوات انفجارات ضخمة بتهز أبو ظبي والرياض دلوقتي… وبالنسبة لإسرائيل فـ صفارات الإنذار شغالة دلوقتي في القدس وتل أبيب، والتحديثات والتطورات أسرع من قدرتي على الكتابة، تقريبًا عقبال ما تقرأ السطرين دول هتكون في دولة جديدة اتقصفت…

🟠🔵 القوات الإيرانية خلال نص ساعة بس ضربت كل العواصم الخليجية ما عدا عُمان!

دي مش حرب عادية بين دولتين… دي حرب إقليمية شاملة بين دول كتير، وفي إمكانية حقيقية لإنها تتحول لحرب عالمية، وده حاليًا يعتبر الاحتمال الأكبر…

4️⃣ آخر حاجة حصلت دلوقتي هي إن ترامب في فيديو مدته 8 دقايق، وجه رسالة مباشرة للشعب الإيراني وللحرس الثوري، طالبهم فيها بوضع السلاح فوراً ووعدهم بـ “حصانة كاملة” لو استسلموا، وقال للإيرانيين: “دي فرصتكم الوحيدة للأجيال الجاية عشان تستردوا بلدكم”… وفي المقابل، الخارجية الإيرانية وصفت اللي بيحصل بـ “العدوان الإجرامي” وقالت إن الرد هيكون حاسم وهيخلي المعتدين يندموا…

🔴 الساعات اللي جاية هيكون في تحديثات لحظية وبوستات كتير، ف ربنا يستر علينا، وأي حد موجود في دولة خليجية دلوقتي ويقدر يخرج منها ويسافر يا ريت يعمل كده، لإن الوضع لسه هيبقى أسوأ بكثير.